Best Boy Column

-恭喜發財，其實健康最緊要，都係恭祝各位身體健康最上算。
-可以預料2010年將會有好多外國show舉行，這其實都要多謝幾間搞show公司努力；事實上，Best Boy今日去睇外國show，發現一個同往時好唔同之情形，就係中國人同外國人的比例轉了，以前一D外國show，外國人有時會佔上三、四成甚至一半，而有唔少更係外國人多過local fans；但今日所見，本地入場樂迷幾乎已佔上七成甚至更多，所以宣傳上已大有不同，如果重以為外國show就賣西報廣告，咁就大錯特錯啦！
-今年外國show不斷出現，老牌rock band Deep Purple來港演出，雖然人選已大有不同，但聽番Highway Star、Smoke On The Water…，好yeah，Best Buy一定捧場。
-當然最yeah是睇Tom Jones三月個show，一定支持，因為佢在台上的表現完全夠放，而且歌曲好經典，更重要係隨住時代而進步，唔似好多舊歌手，時時都金曲會知音；Tom Jones演唱會在外國一直是高評價，Headlines推介。
-商品搵歌手賣廣告好正常，而好多時都借歌手把口唱幾句；其實最成功都算係容祖兒，每次唱首廣告歌都會變成plug歌；不過近期最煩厭莫如軒仔為紫菜唱廣告歌，用studio錄音橋，硬要佢打冷震咁唱，而咁又話good take，完全暴露香港D監製剩係識得要歌手唱歌打冷震，I don't like it呀！
-當然，抄人地首歌當廣告新歌，而且落埋碟，電台又照播，正一係呃到一時呃唔到一世咯！最弊連廣告客戶都變成老襯。
-今期Headlines會有篇「2009年最差和最佳唱片cover」之feature，title大意係咁，我果日上去Headlines見佢地排緊呢版，真係好得意。我Best Boy一直都封譚小環當年果張雀籠笠住頭個封面係經典，今年衛小姐可以超前咯！上期新城DJ林伯希果篇文章的題目「人體的奧秘」，我鍾意呀！
-上期我Best Boy講開電台DJ的做節目方式，粗鄙低俗。點解電視台常有人投訴節目有問題，但電台好似冇人關心，廣管局有冇人scan住呢？唔該唔好教壞細路啦！
-Headlines去年全力推薦的陳潔麗「儂情」專輯，銷量甚佳。去年底在廣州的演唱會，Headlines也作現場報導，當日所見，製作非常認真，而且Lily的現場演唱真係極之專業，唱出曲味。據悉農曆年前，所屬公司將會推出陳潔麗的廣州「儂情」現場會live CD，香港樂迷可以如置身現場的欣賞到陳潔麗的演出，也可足以證明Headlines的推介，絕非空談。
-農曆年後第一個有足夠份量的演唱會，首推在二月二十日開始，連續兩日的「盧廣仲香港演唱會」OH YEAH!!，地點係Star Hall，據聞唔少fans已在一月底已向主辦當局WOW Music訂飛；一直以來盧廣仲的清新手法好受大專生歡迎，而年初七、八仍係年假，而且係星期六、日，檔期甚佳，完全較正天時地利。我Best Boy都係盧廣仲fans，到時在Star Hall見面。話唔定我都梳個冬菇頭，所以認住我Best Boy啦！據聞，到時盧廣仲show會玩好多新招，包保睇到開心又有賀年氣氛。
-之前盧廣仲推出了Oh Yeah專輯，由於裏面歌曲好hit，故仍然大賣；而配合呢個香港show，唱片公司會推出一張「盧廣仲︰革命前夕的錄音日記︰The Recording Diaries」，是一張以DVD形式記錄他錄音的幕後情況，好特別同好有盧廣仲果種氣味！